BELAJAR PASAMBAHAN ADAT MINANGKABAU

DASAR-DASAR PASAMBAHAN AKAN MENYANTAP HIDANGAN KETIKA ACARA ADAT DIMINANGKABAU.

Pakiah : Sipangka

Katik : Sialek

Pakiah : Angku katik

Katik : iyo ambo

Pakiah : kabakeh angku rundiang sapatah

Katik : manitahlah pakiah

Pakiah : Saaluran sambah jo titah tarati dimujilih nan ko lai ma'af dipintak jo kabanaran angku katik ambo jalang, artinyo jo kabanaran angku ambo jalang, dihari sahari nan ko hari elok bakutiko baiak, alah disuruah nan mudo matah bacapek kaki baringan tangan manatiang mahedangkan juadah nan sabuah, rupo lah samo kito liek raso nak samo kito cubo, nak nyo salamaik samparono aia katangah mintak diminum juadah katangah mintak dimakan, iko nana nandiantakan kabakeh angku kati. Sakian sajo angku.

Katik : yo alah sampai pakiah.

Pakiah : bilang alah angku.

Katik : kabakeh angku juo malah.

Pakiah : lalukan angku katik.

Katik : sapanjang kabanaran pakiah nan katangah iyolah dalam barih jo balabeh dalam lingkuangan adat jo pusako, adat lamo pusako usang jalan rayo titian batu itulah kato man subananyo, adat aia minta diminum pusako juadah mintak dimakan, iyo baitu pakiah adat didapek dinan tuo dari dulu sampai kini tingga dikito mamakaikan. Ba jikok diambo itu kini nak nyo janiah nan dibasuah nak nyo tareh sado ditampi, dek dunsanak lai duo batigo samantaro rundiang dilatakan bakeh ambo maklumlah pakiah tantang itu. Sakian sajo pakiah.

Pakiah : alah sampai angku ?

Katik : bilang alah.

Pakiah : sapanjang kabanaran angku nan katangah bajaln rayo titian batu adat lamo pusako usang itulah kato nan subananyo, kato suranh babulati kato duo batigo bapaiyokan, alah manyanagkan bana didalam hati. Ba a diambo itu kini diateh kandak kadibari pintak dipalakukan ambo tunggu kabanaran angku. 

Katik : sapanjang kabanaran pakiah nan katangah iyolah pakiah irang elok salendang dunia urang kayo suko tamakan satu kandak satu babari alah manyanangkan bana didalam hati. Nan ambo tuntuik nyato bapamandangan jaleh iyolah kato pakiah nan sapatah, dek karano alah gugua ditampuak sakah di dahan ambo palalu kabanaran pakiah.

Pakiah : laluan angku.

MAMPAIYOKAN ( dipart berikutnya )

Mangumbalikan sambah ka sipangkalan :

Katik : manyo pakiah.

Pakiah : iyo ambo angku katik.

Katik : kabakeh pakiah titah dikumbalikan.

Pihak diparundiangan kito tadi tarago ambo tagak baiyo duduak bakato jo bamolah, alah dapek di bulek nan sagiliang di pipiah nan salicak, bulek lah bulieh digiliangkan pipieh lah buliah dilayangkan, tantangan dikato kamanjawab gayuang manyambuik diambo juo tarabiknyo, artinyo bana satantang di juadah nan katangah suai juo bak pitua pakiah, sagadang gadang biduak ba nankodon sagadang gadang alek basipangka, ba a dikami tu kini nak dimulai dipangka daulu mairiang kami alek pakiah, sakian sajo kajawabnyo 

Pakiah : yo lah sampai angku katik

Katik : bilang alah

Pakiah : sapanjang kabanaran angku katik nan katangah pihak diparundiangan kito tadi alah, nak dimulai disiko mairiang mak kan yo bana baitu ?

Katik : subananyo

Pakiah : alhamdulillah, dimulai disiko jo bismilah angku ha, mairiang angku disinan.

Katik : yo samo samo bismillah pakiah.

Kemudian sialek dan sipangka memulai makan dan mkinum juadah nan katangah.

Dibuat :11 agustus 2024

Penulis : Rahmat Putra SH.I Labai Parmato

( Mohon koreksi bagi pembaca dan mohon ma'af jika ada kesalahan penulisan )